اعرفها من 8 سنين علاقة سوشيال ميديا

اعرفها من 8 سنين .. علاقة سوشيال ميديا .. كنت فاكراها صاحبة اختي الصغيرة عشان كاتبه انها نفس مدرستها ف مركزتش معاها كتير 
مفيش بوست اكتبه الا و تكون اول واحدة متفاعله فيه .. 
و كلماتها جميلة بتدخل قلبي 
بتحاول كتير تتواصل معايا .. و نفسي اتعرف عليكي و احنا جيران .. و ارد بكلام المجاملات .. اه ده من حظي اكيد لازم نشوف بعض .. و انسى الموضوع 
و كانت كل فترة تبعت تسال و ارد عليها بطريقة رسمية ..
مركزتش حتى في صورتها عالبروفايل عشان اعرف انا بكلم مين مكانش في دماغي خالص التواصل معاها 
فضلنا كده لحد من عشر ايام لقيتها بعتتلي انا عايزة رقم تليفونك .. قلت لها طبعا مفيش مشكلة اتفضلي 
اتصلت عليا .. و لقيتها بنوتة عسولة و دمها خفيف و مرحة جدا .. و عندها اصرار رهيب على انها تقابلني و طبعا زي ما كلكم عارفين .. انا بقابل صحابي اصلا بالعافية ف فكرة اني اقابل واحدة لسا هتعرف عليها مرهقة جدا بالنسبة لي 
قالت لي انا مش هزعجك كتير بقا

هستنى مكالمتك تحددي فيها موعد نتقابل امتى 
قلت لها لا لا انتي كده فهمتيني غلط جدا .. حضرتك اللي هتتصلي بيا .. و مش مرة و لا اتنين .. لو عايزانا نتقابل فعلا خليكي زنانة و متزعليش من عدم ردي او تجاهلي .. عشان انا عارفة و متاكدة اني قليلة ذوق جدا .. بس والله العظيم ما يتزعل مني 
اللي موجود في حياتي النهاردة هما اللي عافروا كتير عشان يفضلوا فيها .. و اتحملو سخافات اكتر مني 
عارفة فلانة اللي بتكتب لي كتير ع الفيس بوك دي قالت لي اه .. قلت لها دي ساكنه في التجمع الخامس .. قعدت تتصل اربع ايام مبردش .. قلقت و جاتلي البيت و فضلت ساعه تحاول هي و اهلي عشان اطلع اقابلها . 
و مع زنهم طلعت و اول ما شفتها قلت لها انتي ايه اللي جابك مبردش يعني مش عايزة اتكلم مع حد انا زي القردة و كتر خيرك .. ريحي من المشوار و خدي واجبك اتكلي على الله و دخلت اوضتي تاني 
عارفة رد فعلها كان ايه فضلت قاعدة مع مامتي و اخواتي بتاع اربع ساعات لحد ما لمحتني خارجة من اوضتي و راحت حضنتني و قالت لي حقك عليا لو ضغطت عليكي .. قلت لها انا اللي اسفة معلش و طبعا لحد النهاردة هي من اقرب الناس ليا 
بس متقلقيش المرحلة دي عدت خلاص و مش هبقا بقلة الذوق دي معاكي .. بس بفهمك شخصيتي و وضعي الحالي عشان ناس كتير بتزعل مني اوي و حقهم بس والله فعلا غصب عني 
قالت لي لا انا معنديش دم و مبزعلش و لو ع الزن مفيش اكتر منه .. اتحملي انتي بس 
و فعلا تحسوا انها ما صدقت .. و كل شوية رسالة عالواتس اب .. يلا نتقابل النهاردة .. اقولها مينفعش .. تغيب ساعتين و تبعت .. و لو مردتش تتصل سبعين الف مرة .. عملت لي ازعاج فعلا و بقيت عمالة اقول لنفسي ايه التدبيسة السودا دي و ايه اللي عملته في نفسي ده 
لحد امبارح .. في اتصال من اتصالاتها قلت لها انا نازله عندي كذا مشوار تابعيني كده بالتليفون عشان نتفق نتقابل امتى و فين .. و طول اليوم فعلا بتبعت و انا بقولها لسا 
لحد ما خلصت كل مشاويري و نسيتها تماما و خلاص داخلة ع البيت و لسا هركن .. لقيتها بتتصل قلت خلاص هعتذر لها و نتفق على يوم تاني 
اول ما كلمتها لقيتها مخنوقة و صوتها مش كويس قالت لي خلصتي و لا لسا قلت لها اه .. انتي كويسة  
قالت لي انا عارفة اني ضاغطة عليكي بالمقابلة دي بس حقيقي انا محتاجالك جدا و محتاجة اقعد مع حد زيك حاسة انك شبهي اوي و انتي اكتر حد هتفهميني 
بصراحة مقدرتش اعتذر لقيتني بقولها ابعتيلي لوكيشن بيتك هجيلك اخدك و نقعد في اي حته ..
انا نقطة ضعفي فعلا حد يكون في مشكلة او محتاج يتكلم .. لو بموت من الهم اللي على قلبي لازم اسمعه .. 
ممكن اتعزم على 100 فرح و ما احضرش .. بس في العزا هتلاقيني اول واحدة هناك .. 
ممكن اكنسل كذا خروجة و اقعد بالشهور محدش يشوفني .. بس لو بابا صاحبتي في المستشفى مثلا مبفكرش مرتين .. لازم ابقا معاها هناك .. 
باختصار هتلاقوني في المصايب بس .. لدرجة ان اصحابي لما يبقو عايزني ارد عليهم يبعتولي ردي بسرعة انا في كارثة .. او الحقيني .. او عايزاكي ضروري .. في اقل من ثانية اكون متصلة عليهم ..