اعرفها من 8 سنين علاقة سوشيال ميديا

الاقيهم بيضحكوا و يقولو عايزين نطمن عليكي ف اقولهم زي الفل و اقفل في وشهم 
و رغم انها اتكررت كتير بس مبطلتش ارد عالمسج دي لاني بخاف تكون مرة بجد 
اظن دلوقت عرفتوا انا طاقتي السلبية اللي منتشرة في ارجاء المكان جاية منين 
المهم .. اتقابلنا .. بنوتة جميلة و صغنونة كده .. تبان اصغر من سنها كتير عندها 28 سنة .. بس في نفس الوقت وشها بهتان عنيها حواليها هالات سودا .. تحسوها شايلة هموم الدنيا 
قلت لها انتي وشك جميل و مريح اوي و دخلتي قلبي .. بس ايه مزعلك مخلي ملامحك الحلوة دي مطفية كده 
قالت لي والله مش عارفة ابتدي منين .. بس انا مامتي ماتت و انا عندي 16 سنة .. و عشان علاقتي بيها مكانتش احسن حاجة .. حسيت بالذنب اوي لدرجة اني حاولت انتحر وقتها . بس نظرة بابا ليا بعد ما انقذني دمرتني و خلتني بوست ايده و اعتذرت له و خدت عهد على نفسي مستحيلىافكر اعمل كده تاني 
بابا جميل اوي يا نورا لما بتكتبي عن باباكي بحس انك بتتكلمي عن بابايا انا .. بس الفرق ان باباكي كان حنون

اوي و مالي الفراغ العاطفي اللي ممكن يكون جواكي لكن بابا عملي و مشاعره جامدة .. غير كده هو اب مثالي و بحبه اوي 
انا لقيتني فجأة بقيت مسئولة عن بيت و اخوات و اكل و شرب و غسيل و تنضيف .. رغم اني ليا اخت اكبر مني بس كانت رافعة ايدها من كل حاجة و معتمدين على اني شخصية بحب العطاء بس كمان عايزة التقدير 
من كتر ما انا شخصية خدومة بقا كله رامي عليا الحمل .. حتى اختي و مرات اخويا استغلوا حبي للاطفال و رمو مسئولية ولادهم عليا انا اللي مربياهم مش هما 
انا عمري ما اشتكيت و لا طلبت شكر من حد بس لما اعيش حياة مش حياتي و اشيل مسئولية ناس تانية السنين دي كلها .. المفروض اول ما افكر في نفسي و حياتي يبقو هما اول ناس جنبي 
بس للاسف مجرد ما عرفو اني قدمت على رسالة الماجستير لقيت الف اعتراض من بابا و اخواتي .. ليه و ده وقته و انتي فاضية للرسالة 
مش عارفة وقته امتى ! و ايه ممكن يكون شاغل بنت مش متجوزة و لا عندها بيت و ولاد .. عن الماجستير 
حسيت ان سنين عمري راحت هدر .. و ان اللحظة اللي فكرت فيها في نفسي استكتروها عليا و كأني مكتوب عليا ابقا شقيانة طول عمري 
و فجأة غيرت مسار الحديث و ضحكت و قالت لي انتي ايه انطباعك عني قبل و بعد ما قابلتيني 
قلت لها بصراحة انا قلت قبل ما اقابلك دي هتبقا عيلة تافهة و هتاكل دماغي بحوارات البنات اللي مبتخلصش 
لقيت قدامي بنت عندها نضج واحدة اربعين سنة .. و شكل بنوتة عشرين سنة .. جميلة و رغم الوجع اللي في كلامك مرحة و دمك خفيف .. عندك لباقة و بتعرفي تعبري عن نفسك و مشاكلك كويس حتى و انتي متلخبطة ..
لماحة و ذكية و عرفتي ان شخصياتنا شبه بعض رغم انك مشفتيش الا اللي بكتبه بجد انا مبسوطة اني عرفتك و اكيد ان شاء الله هتبقا اصحاب 
قلت لها لازم تتمردي ع الوضع الحالي لازم تعيشي حياتك و سنك .. لازم و قبل ما اكمل قاطعتني 
قالت لي انتي عارفة انا ليه مخنوقة النهاردة قلت لها ليه 
قالت لي اخواتي الاصغر مني هيناقشو الرسالة كمان كام يوم و انا لسا بيتقالي أجلي و مش وقته 
انا عمري ما كنت حقودة بس مش عارفة مبقاش مخنوقة و زعلانة و مقهورة كمان على نفسي حتى عتاب او فضفضة لبابا مش قادرة اعملها مش عايزة ازعله مني و هو خلاص في اواخر الستين رغم كل المسئولية دي بس بابا ليا السند و الضهر و الامان و انا اكتر واحدة في الدنيا ممكن تقدر حالتك و تفهم المعنى ده عارفة انا من يوم وفاة باباكي و انا مرعوبة على بابا و بعمل كل حاجة تخليه راضي عني 
قلت لها و انا كنت هقولك كلام كتير اوي عن ازاي ممكن تتمردي ع الوضع الحالي بس لجمتيني ب باباكي ربنا يخليهولك و يبارك لك في عمره 
تليفونها رن ردت .. ايوا يا بابا انا جاية علطول معلش محسيتش بنفسي و قفلت و قالت لي معلش يا نورا انا كنت مستأذنة ساعتين بس و محسيتش بالوقت معاكي و عدى تلات ساعات ازاي مش عارفة .. 
انا فرحانة اوي اننا اتقابلنا .. بس والله العظيم انا مش كئيبة انا مرحة و مقابلتنا الجاية هتتاكدي من ده ف متخافيش مني و تقولي دي نكدية و تبعدي 
قلت لها متقلقيش انتي ما دام كئيبة و نكدية اكيد هنبقا اصحاب و هتلاقيني انا بسعى عشان اقابلك 
يلا نشوفك على خير ..
سلام
سلام
حكايات_نورا