تحقيق جرائم نور منصور كاملة جميع الفصول عُدي و أنس نرمينا راضي

صوت طفل بيئن و بيزن بس مش واضح أو بيعيط عياط مكتوم و كل اما أركز معاه الصوت يختفي اتجاهل الصوت فيرجع تاني بقيت مشتتة مش عارفة أركز مع مين.. 
نهى كتبت
في أول أسبوع سكنا في الشقة كنت بحس إن فيه حد بيراقبني دايما مع إني ست مؤمنة و مبخافش من حاجة بس كل مرة كنت بحس بحد ورايا كنت ببقى في قمة خوفي.. مكنش قدامي حل غير أروح اسأل الراجل اللي ساكن جنبنا أول اما سألته عن الشقة اللي أنا فيها و اللي بحس بيه اتفزع و كرشني برا شقته و قالي ابعدي عنا يا ست أنت.. استغربت من معاملته بس قولت أكيد خايف من اللي حكيته.. حقه بصراحة.. روحت لجارتنا اللي جنبي و لما حكيت لها سكتت شوية و بصت لعيالي زي ما تكون صعبوا عليها فقالت
ايه اللي حدفك هنا بس مش هتعرفي تخرجي من الشقة غير اما ياخدوا اللي عاوزينه و أي حد فكر يقف قصادهم بيأذوه و أذيتهم فيها موت
أول اما كتبت كدا بلعت ريقي و قلت في نفسي
يا حلاوة! و طبعا أنا اللي بفكر ارجع الولدين و اقف قصادهم.. اممم عرفوا إني لما اسمع من المنطقة و الموضوع يتنشر عن قصة اختفاء عدي و أنس هبدأ ادور عليهم و اساعد أمهم فهما سبقوا الأحداث و جابوني لحد هنا عشان يخلصوا مني! ولاد جنية بصحيح
المهم نهى كملت اللي بتحكيه ليا وهي لسه منهارة
و جارتي دي يا نور عشان قالت لي الكلمتين دول بس تاني يوم جوزها كان واخد عيالهم يفسحهم وهي كانت حامل فمقدرتش تنزل.. جوزها و عيالها خبطتهم عربية و ماتوا وهي من زعلها سقطت و مرضتش تطلع من الشقة و بقت عايشة في حزن على ذكراهم 
في اللحظة اللي بتتكلم فيها بحزن كدا كان هاين عليا اجيبها من شعرها و اعجنها من الضرب.. الهي منك لله و أنا ذنب أمي إيه.. اهمدي في جنب على ما اتصل اطمن على ابني و جوزي طبعا قولت الكلام ده من غيظي جوايا هي برضوا مغلوب على أمرها.
كلمت جوزي اطمنت عليه الحمدلله بخير و كذلك ابني فاستودعتهم الله و استعنت بالله إني احاول بقدر الامكان أرجع الطفلين لأمهم و ربنا المعين بقى.. أنا كمحققة في الجرايم الغامضة مينفعش اشوف جريمة بتحصل و ادير وشي بس المرة دي الجريمة خارج نطاق تغطية البشر! لأ إحنا نجيب حمادة هلال يساعدنا بقى مش هينفع كدا.. كملي يا ولية يا وش المصايب قصدي يا غلبانة يا أميرة.. كملي ده إحنا شكلنا هيطلع عينا بسببك.. كملي و طبعا قولت ده من جوايا و الحمدلله إني بعرف اكظم غيظي..
كملت نهى
قررت استسلم و اعزل من الشقة و كلمت الست روحية يدوب قفلت معاها المكالمة لقيتها واقفة على الباب بتخبط! فتحت لها و أنا مرعوبة و مستغربة هي جات بسرعة الصاروخ كدا ازاي ده كانت بتقول إنها في بيتها و هتيجي تتكلم معايا! و هي أصلا كانت قايلة لي و أنا بأجر الشقة إنها ساكنة بعيد عن عنها و الشقة دي سابها لها ابنها بعد ما مات هو و حفيدها و مراته بماس كهربي فبقت تأجرها للناس عادي.. أنا كلمتها أقولها إن الشقة غريبة و بيحصل فيها حاجات ترعب.. زي إن أكون منضفة و مروقة و بعد ما اخلص الاقي الشقة رجعت مقلوبة تاني! و إني دايما بحس بحد ورايا و بسمع صوت طفل بيعيط و كوابيس مزعجة كتير فعشان كدا كنت عايزة اسيبها 
ده لازم تسيبيها زي منا نفسي اسيبك دلوقت
مش فاهمة
كملي يا نهى سيبني اخرج اللي جوايا بدل ما انفجر فيك و فيهم 
الست روحية جات قعدت معايا تقنعني افضل قاعدة فيها و اني بيتهيألي و مش هلاقي شقة احسن منها في الايجار و كلام كتير و أنا مصممة اسيبها.. اتعصبت عليها و قولت لها هنفسخ العقد حالا يا إما هقول للناس كلها على سمعة الشقة.. أول اما قولت لها كدا شكلها بدأ يتغير لوش مرعب بشع و مسكتني من رقبتي كنت قربت اطلع في الروح من ايدها الجامدة اللي بتخنقني و قالت لي بنبرة خشنة مش هتطلعي بمزاجك.. بمزاجنا احنا لازم الوعد يتم و فضلت تكرر لازم الوعد يتم لحد ما هزيت راسي إني موافقة عشان تسيبني و سابتني وراحت داخله اوضة عيالي كانوا بيلعبوا فيها و فضلت تبص على أنس ابني الصغير وتعيد تكرير لازم الوعد يتم و خرجت وهي بتبص لي بتحذير.. ساعتها انهارت مكاني يا نور وخفت استعين بأي حد تأذيني أنا وعيالي 
فضلت تعيط فاتنرفزت و زعقت
يختي مش وقت سهوكة انجزي في يومك دا خلينا نلحق نوصل لأي حاجة 
المهم كملت كتابة
في نفس اليوم بالليل لقيت ابني الكبير جاي بيعيط و يقولي يا ماما اسمعي كلامهم عشان نعيش.. استغربت من اللي بيقوله و سألته تقصد ايه.. قالي وهو مرعوب
عمو جه و قالي قول لأمك تروح المقابر و تفتح تربة فاضية تحط فيها أنس و تسيبه و تمشي و هو هيلعب معاه و يبعته تاني و لو معملتيش كدا هياخدني أنا و أنس على طول و هيلعبنا على الشناكل
قربان! هو قربان زي ما قولت! يعني المرة دي أنا بواجه كائنات مش متشافة أصلا لأ و كمان دخلنا في سكة قرابين و عفاريت و الست روحية مش مستحميه و ليلتنا حلوة شبه وشنا النهاردة! منك لله يا نهى يابنت.. أمك اسمها إيه 
حلاوتهم
أمك اسمها حلاوتهم و الجن قال لابنك هلعبكم على الشناكل! ده جن من عزبة الصفيح ده ولا إيه! 
كنت حاسة إني في مسرحية هزلية لو مخدتش الكلام بهزار ممكن اتجنن! أنا أول مرة أمر بالحاجات اللي محدش يستوعبها دي حتى نهى كانت مستغربة من طريقة كلامي الهزلية رغم الخوف اللي ظاهر عليا.
يعني اللي طلع لابني ده جن! 
اومال أنت فاكرة إيه غامبول بيعرض مهاراته! يا حبيبتي الشقة مسكونة.. أنت لسه مفهمتيش بعد كل ده! 
لقيتها اتخضت أوي و جات مسكت فيا فمسكت أنا كمان فيها لأني بصراحة كنت خايفة برضو بس مش قوي عشان ميخلصوش عليا لو حسوا بضعفي.. بعدت عنها و أنا بربط كل الكلام اللي قالته ببعضه فسألتها و أنا ماسكه صورة الولدين ببص فيها
كملي و بعدين 
كتبت فكرت ان حد دخل الشقة تبع الست روحيه و قعد مع العيال و مش فاهمة اشمعنا أنس ابني اللي حاطينه في دماغهم ده لسه بيرضع 
يعني لو مفطوم عادي! كملي يا نهي يابنت حلاوتهم بدل ما اقوم افتح دماغك.. كملي
أنا مش عارفة أنا ليه بتكلم بالسوقية دي و متعصبة بس حقيقي الموقف متعب للنفس و مريب و يشيب الراس و كتر خيري اني متماسكة والله رغم كل ده ده أنا حتى خايفة أقوم اعمل كوباية شاي اظبط بيها دماغي الاقي عفريت طالع لي من البراد يقولي شبيك لبيك سكرك إيه!.
جيت اكلم الست روحية تاني احكي لها اللي حصل مردتش عليا غير بجملة واحدة.. افتحي الباب! فتحت الباب لقيت صورة عيالي مع الراجل ابو قناع ارنب ده.. اتصدمت و جريت على اوضتهم ده انا لسه سيباهم ملقتش لهم أثر! اختفوا ازاي! فضلت اصوت و اعيط و الجيران اتلموا كل اللي يعرفوا الحكاية يمشوا من غير ولا حرف و يقولوا ربنا يعوض عليكي.. قررت اروح ابلغ الشرطة لقيت حد مسكني جامد من ايدي زقني في الحيطة و الباب اتقفل قمت احاول افتح فيه مش راضي يتفتح أبدا ببص في ايدي لاني حاسه بحرقان لقيتها محروقة.. قعدت كام يوم احاول مع الباب و اصوت استنجد بأي حد محدش معبرني خالص و النهاردة بس الباب اتفتح لوحده أول حد فكرت اجيله هو أنت يا نور 
يا زين ما اخترتي ياختي ده إحنا هيتعمل مننا بطاطس محمرة.. كملي يا حلاوتهم قصدي يا نهى
و قبل ما اوصلك البيت اغمى عليا فوقت لقيت نفسي زي ما جيتي و شوفتيني كدا 
الله أكبر و هما جروني لهنا عشان يخلصوا مننا احنا الاتنين! ده أنا بله ترمس من امبارح و زمانه استوى عايزة اكله! منك لله يا نهى 
قعدت على الكنبه اللي ورايا و فضلت افكر بهدوء شوية و كنت ببص في الصورة و مركزة فيها أوي كان نفسي اتصل بالشرطة يجوا يطلعونا لأن من ساعة ما دخلت و الباب اتقفل و مش راضي يتفتح بس افتكرت اني لو عرفت حد أهلي هيتأذوا فقررت أواجه جمايكا لوحدي و اللي مكتوب لنا هنشوفه.
بقلب الصورة اشوف الكلام اللي كان مكتوب لي عليها لقيته اتمسح و اتكتب كلام تاني!
لو عايزة ترجعي الطفلين يبقى تمشي ورا التعليمات اللي هكتبهالك هنا 
ايه ده! أنا وشي شبه وش كركر دلوقت لما بتيجي له الحالة و يقولك إيه ده!
إيه شغل مدرسة السحر هاري بوتر ده! تعليمات ايه اللي امشي وراها! ببص بعيني بتلقائية جنبي لمحت ورقة مرمية على الأرض جنب رجل الكنبة عليها نجمة.. النجمة دي تبع الماسونية! أوف لقد وقعنا في الفخ.. أنا قرأت عن الماسونية كتير و اعتقد إن عندي معلومات كتير عنهم.. حلو كدا أبدأ اشتغل صح.
ربط الأحداث ببعضها و اللي كنت شاكه فيه طلع صح.. الست روحية الجهنمية تبع جماعة الماسونية و عشان طقوس عبدة الشيطان تمشي مظبوط و يعترف بيك كشخص ماسوني يعني عابد للشيطان استغفر الله بتعمل كام حاجة كدا مطلوبة منك في مقابل يتحقق لك كل اللي أنت عايزه و طبعا ده شيء قمة الجهل و قمة الكفر و قمة القرف و قمة جبل ايفرست.
الست روحية كان فعلا عندها ابن متجوز و مخلف و مات في الشقة دي بس تقريبا مات مقتول حد بينتقم منه أو من أمه فعمل الماس ده و موت الأب و الأم