تحقيق جرائم نور منصور كاملة جميع الفصول عُدي و أنس نرمينا راضي
صوته المرعب بيزيد.. لقينا قطط سودة كتير قدام الباب الداخلي القطط نظراتها مرعبة مش قطط من بتاعتنا دي حتى صوت المواء غريب و مخيف.
بسأل الشيخة عطية عنهم قالت لي بهدوء
ولا تشغلي بالك دول الجن اللي شغال معاها بس ميقدروش يعملوا لنا حاجة لأن الجن اللي مع مهند القبيلة بتاعتهم معاها اتفاق مع القبيلة التانية إن محدش فيهم يتعرض للتاني حتى لو كان تحت خدمة البشر
لا محترمين بصراحة إحنا عندنا لو عيل بيلعب مع عيل في الشارع و ضربوا بعض العيلتين بينزلوا في بعض طحن
كنت بتكلم باستهزاء لحد ما لاحظت قطة معينة بتبص لي جامد احساس جالي فجأة إن ده الجن اللي كان بيبعت لي رسايل على الصورة الشجاعة خدتني و قربت منها و أنا بقول
عاملي فيها إبراهيم الأبيض! ده الشيخ مهند هيلاعبك على واحدة و نص.. اصبر بس
لقيت عينين القطة قلبت على أخضر و ابتسمت ابتسامة فيها أنوثة كدا و اتكلمت أول اما نطقت.. نهى من الرعب مسكت فيا تاني.. منك لله يا نهى.
اوعدك إنك بالذات مش هتطلعي من هنا سليمة
خلاص مكنش ينفع اخاف الأمر واقع و كل حاجة بتحصل حقيقية رديت على الجن اللي متصور في قطة بنفس بروده
سؤال بس و مش هتكلم تاني.. ليه متصور في قطة مش قط و أنت ذكر! هو البعيد مخنث!
أول اما قولت الكلمة دي راح الشيخ مهند مزعقلي
نور.. لو سمحتي ماتتكلميش معاهم مينفعش توجهي لحد فيهم إهانة عشان بنود الاتفاق بتنص على كدا
بصيت لنهى و كان هاين عليا اطبق على زمارة رقبتها اطلعها أعمل بيها فرقة موسيقية أنا بسببها موجودة هنا بس صعبت عليا لما بصيت في وشها هي غلبانة فعلا و الغلابة الدنيا مش بترحمهم فمش هنبقى إحنا و الدنيا عليهم!
الست روحية طلعت لنا قبل ما الشيخ مهند يفتح الباب الداخلي.. شفتها! شفت أس المصايب ست عجوزة شكلها بشع من عمايلها عينيها نظراتها شر.. أول اما طلعت لنا القطط اتجمعت حواليا و شكلوا دايرة كأنهم بيحموها فالشيخ مهند بص للقطط و اتكلم بثقة
مصلحتكم مش معاها دلوقت نسيتوا هي عملت ايه في اخواتكم لما سابتهم و ادت ولائها لابليس!
القطط صوت المواء بتاعها بدأ يعلى كأنهم معترضين على كلام مهند و بعد دقايق بدأوا يبعدوا عن الست روحية.
روحية بصت للشيخ مهند و زعقت
عايز ايه يا مهند
رديت
هيكون عايز إيه يعني! جاي يطلب منك إيد سمر خانو! أكيد عايزين العيال ده أنت ست عايزة الولعة
رد مهند
أنت عارفة أنا جاي ليه يا روحية هاتي العيال بهدوء بدل ما نعمل شوشرة و هتخسري و أنت عارفة
نسيت نفسك! ده أنت كنت صبي من صبياني
كنت و كنت فعل ماض مبني على الفاضي
بعد رد الشيخ مهند عليها الحماس خدني اني اصقف بكفي في حركة عشوائية و أنا منبهرة برده
الله عليك يا شيخ مهند حكمة مأخوذة من على عربية نص نقل بتنقل رمل مش كدا !
كلهم بصولي لثوان ببرود حتى القطط كأنهم بيقولوا لي مش وقت استظراف الله يباركلك عاوزين نخلص الليلة دي.
الشيخ مهند مستناش لحظة و دخل البيت من جوا بعد ما زق الست روحية و مراته الشيخة عطية بتقرأ آية الكرسي بصوت عال مرضتش تقرأها برا لما كانت القطط موجودة عشان متحرقهمش لأن ده خارج بنود الاتفاق و دخلت وراهم و نهى ماسكة فيا كالعادة اللي يشوفنا يقول خلفتها و نسيتها!
الست روحية زعقت فيه بس كان شكلها المرة دي خايفة خالص
أمهم وافقت على القربان هي اللي ادتني السماح من غير موافقتها مكنتش هعرف أنفذ الوعد
بصينا لنهى بصدمة حتى هي نفسها اتصدمت من الكلام و في اللحظة دي عدا قدام عينيا زي فديو قصير بيفكرني بحاجة مهمة.. اتكلمت بسرعة عشان انقذها من الموقف
أنت اللي خنقتيها و ضغطي عليها عشان توافق
الشيخة عطية سألتني باستغراب
ازاي ده حصل!
الست روحية جات خنقت نهى و فضلت تكرر الوعد لازم يتنفذ و نهى هزت راسها انها موافقة عشان تسيبها لانها كانت بتطلع في الروح بس نهى مكنتش تعرف إنها بكدا ادتها الموافقة
الشيخ مهند هز راسه بعد ما اتفهم الموضوع و بص للست روحية و قال بتهديد
الإجبار في الوعود بيفسد الوعد فاتتك دي يا ست روحية.. القربان مش بيتقبل طالما صاحبه مش موافق برضاه و أم الطفلين وافقت تحت ضغط.. هاتي العيال أحسن لك يا روحية
الست روحية فضلت ساكتة لدقيقة كاملة مش بتنطق و عينيها اتحولت لسواد بالكامل فكرتني بساحرة الجنوب.. ربنا يهدك يا ست روحية.
الشيخ مهند جه وقف قدامنا كأنه في وضعية استعداد للي هيحصل و اللي بالفعل كان مفاجأة غير متوقعة لنا!
الست روحية بدأت ملامحها تبقى مخيفة اكتر كأنها اتلبست!.. اتكلمت
القربان هيتقدم و الوعد هيتم اطلع أنت منها يا شيخ مهند
هي دلوقت مش الست روحية هي دلوقت جن و ساكنها أنا مكنش ده فارقلي أد ما شوفت علبة السجاير في ايده! جن بتاع مزاج بصحيح!
مش عارفة ايه اللي خلاني استخف دمي و اسأله كأنه من بقيت عيلتي
و علبة السجاير دي بقى ماركت إيه
رد عليا عادي جدا
مارلبورو تاخدي
عيب عليك يا جدع إحنا مش بتوع الكلام ده.. جوزي برضو بيشرب النوع ده بس نصيحة مني حاول تجيب كليوباترا
اشمعنا
يمكن تلاقي فيها حتة آثار ولا حاجة تبيعها بقى و تجيب لك شقة على النيل و شاليه في الساحل الشرير
رد عليا و كان متجاوب معايا جدا
فكرة برضو.. دماغك حلوة
تسلم يا باشا.. أنت جايب العلبة دي منين صحيح من كشك عم سعيد الزعلان أصل هو الوحيد اللي بيبيع سجاير هنا
لأ ده مش من عالمكم ده من عالمنا إحنا
آه إذا كان كده ماشي
الكلام خدني معاه و نسيت إن بتكلم مع جن أصلا بس شكله جن هزق في الوقت اللي بتكلم معاه فيه.. الشيخ مهند و الشيخة عطية و نهى كانوا فاضلهم تكه و ينزلوا عليا ضرب! طب أنا ذنبي إيه أنا عقلي خف بسببك يا نهى.. منك لله يا نهى جدك مسمي أمك حلاوتهم!
الشيخ مهند اتعصب عليا و زعقلي عشان اسكت فاضطريت اسكت عشان اليوم ده يعدي على خير.
الشيخ مهند اتكلم مع الجن كأنه على سابق معرفة بيه
عايز إيه يا شادر الكلام ما يخصكش
اتكلمت في سري
شادر! الجن طلع اسمه شادر! شادر سمك ده ولا إيه!
رد الجن شادر بضحكة سخرية
أنا ميهمنيش الولدين بس مش هسيبك تعمل اللي أنت عايزه يا شيخ مهند.. مش ناسي انك حرقت أخويا
أخوك غلط و يستاهل يا شادر و أنت عارف سيبني اخد العيال و امشي بدل ما هتحصل أخوك
رد شادر وهو بيدخن آخر حتة في السيجارة
اتكلم على قدك عشان ما الغبطش وشك الأمور ده
أنا كنت ببص لهم هما الاتنين و كل شوية اقرص نفسي عشان استوعب إني مش بحلم رديت بصوت واطي
وشك الأمور! دي عركه بين اتنين من إمبابة مش بين جن و إنس! إيه اللي بيحصل ده!
نهى اتكلمت بس بالاشارة على خفيف كدا بسرعة و عرفت أفهمها
خدني أنا و رجع عيالي
ضربتها
و عيالك هتسيبيهم لمين يربيهم لما ياخدوك أنت يا أم المفهوميه! و لا ناوية تسيبيهم ليا! لأ بقولك ايه.. كيلو اللمون بخمسين جنيه احنا ماشين على القد أنا و جوزي و ابني.. اهمدي يا نهى و ماتتكلميش تاني
و بصيت للجن شادر قولت بسرعة بدل ما يصدق كلام الهبلة دي و ياخدها
ماتسمعش كلامها يا أستاذ شادر دي بت مهوية قولي صحيح أنا ملاحظة إن علبة السجاير دي مش مكتوب عليها اسم الماركة
رد وهو بيغمز لي
دي ماركة دلعني و ادلعك
أما أنت جن قليل الأدب بصحيح!
الشيخ مهند جاب اخره مني ففتح الباب و زقني برا و زق نهى معايا وهو بيقول بعصبية
مشوفش وشكم هنا
فتحت الباب بالراحة عشان أشوف اللي هيحصل الشيخ مهند موصلش لحل ولا لاتفاق مع الجن شادر و في لمح البصر الشيخ مهند طلع ازازة مسك من جيبه تقريبا قارئ عليها قرآن و آيات معينة بتؤذي الجن الكافر أول أما بدأ يرمي منها على جسم الست روحية مراته الشيخة عطية بدأت تقرأ قرآن بصوت عال..
الست روحية جسمها اتنفض و فضلت تصرخ جامد كأنها بتتكهرب و يطلع دخان منها بدون ما يكون فيه نار.
الشيخ مهند فضل يتمتم بكلمات معرفتش افهمها بس تقريبا كان بيكلم الخدام اللي معاه لأنهم بدأوا يرسموا نجمة الماسونية حوالين جسم الست روحية و اتضح إنه ناوي يتخلص منها خالص بالطريقة اللي كانت ناوية تقدم بيها الطفل أنس قربان.. يعني انقلب السحر على الساحر!
خلصوا رسم النجمة و الست روحية جسمها اتلزق في الأرض زي ما يكون حد مكتفها في الأرض و بدأت تطلع نار من جسمها.. عدا دقايق كأنها ساعات اترعبت فيهم أنا ونهى.
الست روحية فضلت النار طالعة من جسمها لحد ما اختفت.. اختفت نهائيا ملهاش أثر و اختفت معاها نجمة الماسونية.
سمعنا صوت طفلين بيعيطوا في اللحظة دي الشيخة عطية فتحت باب الاوضه اللي كان جاي منها مصدر الصوت.. لقينا أنس و عدي مربوطين جنب بعض و شكلهم عليه علامات الفزع.
أيوه اتخلصنا من الدجالة روحية و انقذنا الطفلين بس هيفضلوا يعانوا طول حياتهم من المشاهد المرعبة اللي عاشوها ده غير الأذى النفسي اللي مروا بيه خلال الأسبوع اللي كانوا موجودين فيه في البيت المخيف ده.
نهى شكرتنا وهي بتعيط جامد و تحضن في عيالها فابتسمت لها
متنسيش تجيبي حق
الشبشب يا نهى
____تمت.
